2026 жылғы 14 мамырда Ө.А. Жолдасбеков атындағы Механика және машинатану институтында физика-математика ғылымдарының докторы, профессор Әлібай Ысқақбаевтың туғанына 80 жыл толуына орай «Материалдардың қирау механикасы» тақырыбында ғылыми-техникалық семинар өтті.
Салтанатты шараны ашқан Қазақстан Республикасы Ұлттық ғылым академиясының академигі А.Қ. Төлешов өз сөзінде мерейтой иесін бүкіл саналы ғұмырын ғылым мен білімге арнап, еліміздің зияткерлік әлеуетін арттыру жолында аянбай еңбек етіп келе жатқан тұлға ретінде ерекше атап өтті. Ол профессор Ысқақбаевтың терең іргелі білімі мен мол тәжірибесінің сирек үйлесімін, сондай-ақ оның отандық механика саласының дамуына қосқан елеулі үлесін атап өтті.
Семинарда Әлібай Ысқақбаев негізгі баяндама жасады. Деформацияланатын қатты денелердің механикасы, қирау механикасы және материалдардың беріктігі туралы баяндамасында профессор өзекті ғылыми мәселелерге тоқталып қана қоймай, зерттеулердің тек теориямен шектеліп қалмауы керектігін де атап өтті. Бұны оның нәтижелері құрылыс саласында қолданысын тауып, құнды тәжірибелік нәтижелерін берген асфальтбетонның беріктігі жөніндегі жұмысы айқын көрсетті.
Жетістіктері үшін профессор А.Ысқақбаевқа академик Ө.А. Жолдасбеков атындағы Алтын медаль табысталды. Институт ұжымы оны жылы лебізімен құттықтап, зор денсаулық, ғылыми ізденістеріне табыс тіледі.
